ERU OSMON OʻRTASIDA

Ustozlik, shogirdlik anʼanasi bashariyat turmush tarzining ajralmas boʻlagiga aylangan, desak aslo mubolagʻasi yoʻq. Ayniqsa, Sharq xalqlarida bu ming-ming yillik anʼana boʻlib, har qaysi zamonda, har qaysi muhitda, har qaysi qatlamda oʻziga xos koʻrinish va mohiyat kasb etgan. Aslo yoʻqolmaydigan bu qadriyatni bugungi avlod qanday qoʻllayotganligi, tabiiyki, hech birimizni befarq qoldirmaydi. “Maʼrifat” gazetasi boʻlim muharriri Xulkar Toʻymanova ana shu qadriyatning zamondoshlarimiz hayotida tutgan oʻrnini turli yoʻnalishlar boʻyicha oʻrganib, ularning barchasini oʻzi xizmat qilayotgan gazetada “Qalb rishtasi” rukni ostida eʼlon qilgan. Ana shu harakatning samaralari, maqolalar jamlanmasi — qoʻlingizdagi toʻplam yuzaga keldi. Uch avlod taqdirining bir-biriga bogʻliq ravishda ifoda etilishi kitobxonlar-ga boy taassurot ulashishiga ishonamiz.